विराटनगर : विराटनगरमा शनिबार मोटरसाइकलले ठक्कर दिँदा स्कुटरमा सवार महिलाको मृत्यु भएको छ । दुर्घटनामा मोटरसाइकलमा सवार २ जना घाइते भएका छन् ।
कोशी लोकमार्गअन्तर्गत विराटनगर महानगरपालिका–१० सोमबारे चोकमा दुर्घटना भएको हो ।
विराटनगरबाट रानीतर्फ जाँदै गरेको प्रदेश १–०२–०४८ प ७०७० नम्बरको मोटरसाइकलले पूर्वतर्फ बाटो क्रस गर्दै गरेको प्रदेश १–०२–०४६ प २३१३ नम्बरको स्कुटरलाई ठक्कर दिएको थियो । दुर्घटनामा स्कुटर चालक मोरङको जहदा गाउँपालिकाकी अन्दाजी ४० वर्षीया फुदो राजवंशीको मृत्यु भएको होृ ।
दुर्घटनामा गम्भीर घाइते भएकी उनलाई उपचारका लागि कोशी अस्पताल पु¥याउनसाथ चिकित्सकले मृत घोषित गरेको थियो । दुर्घटनामा मोटरसाइकल चालक मोरङको बूढीगंगा गाउँपालिका–४ का अन्दाजी १९ वर्षीय मोहमद सहिल मियाँ र पछाडि सवार १७ वर्षीय मोहमद जाहिर घाइते भएका छन् ।
दुवै जनाको कोशी अस्पतालमा उपचार भइरहेको छ । घाइतेमध्ये मोटरसाइकल चालकको अवस्था गम्भीर रहेको प्रहरीले जनाएको छ ।
आमाको मृत्यु, २ बच्चा घाइते
यस्तै रोल्पामा जीप दुर्घटना हुँदा एक महिलाको मृत्यु भएको छ । गंगादेव गाउँपालिकाको घोरनेटाकी २९ वर्षीया सीता खड्काको दुघंटनामा मृत्यु भएको जिल्ला प्रहरी कार्यालय रोल्पाले जनाएको छ । दुर्घटनामा सीताका दुई छोराहरु ३ वर्षका सौरभ र १८ महिनाका सुप्रिम वली गम्भीर घाइते छन् ।
घाइते बालकहरूको स्थानीय गैरीगाउँ स्वास्थ्य चौकी तिलामा प्राथमिक उपचारपछि थप उपचारका लागि रोल्पा जिल्ला अस्पताल रेउघा पठाइएको थियो । त्यहाँ पनि उपचार सम्भव नभएपछि थप उपचारका लागि दाङको घोराहीमा रहेको राप्ती स्वास्थ्य विज्ञान प्रतिष्ठानमा रिफर गरिएको छ ।
लु १ च ९४०६ नम्बरको जीप त्रिवेणी गाउँपालिका–७ गाङमा दुर्घटनामा भएको हो । जीपमा चालक, सहचालक, सीता र उनका दुई छोरा गरी पाँच जना थिए । घटनापछि चालक र सहचालक फरार छन् । उनीहरूको खोजी भइरहेको प्रहरीले जनाएको छ । सीता पेशाले शिक्षिका छिन् ।
