काठमाडौंः नेकपा माओवादी केन्द्रका अध्यक्ष पुष्पकमल दाहाल प्रचण्डले देशमा फेरी एउटा ठूलो आन्दोलनको आवश्यकता महशुस भएको बताएका छन् ।
आइतबार संविधान संशोधनको विषयमा संविधान निगरानी समूहले आयोजना गरेको कार्यक्रममा बोल्दै उनले अहिलेको सरकारले प्रदेशलाई अधिकार दिन पनि नमान्ने र स्थानीय तहलाई बलियो बनाउन पनि नमान्ने भन्दै अर्को विद्रोह आवश्यक भएकै हो ? भन्ने प्रश्न आउन थालेको बताए ।
उनले भने,‘मैले कहिलेकाहीँ के सोच्ने गरेको छु भने नेपालमा फेरी एउटा ठूलो आन्दोलन आवश्यक भएको हो कि क्या हो । प्रदेशलाई अधिकार दिन पनि नमान्ने, स्थानीय तहलाई बलियो बनाउन पनि नमान्ने भनेपछि त के देशले फेरी अर्को आन्दोलन खोजेको हो ? जनतामा फेरी अर्को असन्तुष्टि बढेको बढेको छ । निराशा बढेको बढ्यै छ । अहिले म त्यो निष्कर्षमा पुगिसके भन्ने अर्थ नलागोस्, तर जनतामा देखिएको निराशा, युवामा देखिएको फ्रस्टेशनले त्यो सबै हेर्दा र नेतृत्व हेर्दा यो सरकार पनि संविधानसंवत नै छैन ।’
