काठमाडौं : नेपाल समाजवादी पार्टी (नयाँ शक्ति)का संयोजक डा. बाबुराम भट्टराईले पार्टी नेतृत्व तेस्रो पुस्तालाई दिन प्रस्ताव गरेका छन् ।
काठमाडौंमा जारी पार्टीको प्रथम महाधिवेशनमा संयोजक भट्टराईले आफू नयाँ पुस्तालाई नेतृत्व हस्तान्तरण गरेर वैचारिक नेताको भूमिकामा बस्न चाहेको बताएका हुन् । पार्टीको महाधिवेशन आइतबारदेखि काठमाडौंमा सुरु भएको हो ।
महाधिवेशनको बन्द सत्रमा भट्टराईले आफू वैचारिक भूमिकामा मात्र रहन चाहेको बताएका प्रवक्ता कृष्ण शर्माले जानकारी दिए । तेस्रो पुस्ताका नेताहरूले सल्लाह गरेर टिम बनाउन आग्रह गर्दै आफू वैचारिक भूमिकामा रहने भट्टराईले बताएका छन् ।
भट्टराईले सचिवालय बैठकमा पनि यही प्रस्ताव अगाडि सारेका छन् ।
प्रवक्ता शर्माका अनुसार सोमबार बसेको सचिवालय बैठकमा पनि भट्टराईले सोही प्रस्ताव अगाडि सारेका छन् । उनका अनुसार आइतबार साँझ र सोमबार बिहान पनि भट्टराईले उही प्रस्ताव दोहोर्याए । तर, सचिवालयका सबैजसो सदस्यहरूले अहिले परिस्थिति त्यस्तो नरहेकाले भट्टराईलाई नै अध्यक्षमा दोहो¥याउन सहमत गराउन प्रयास गरेका छन् ।
सचिवालय बैठकमा अधिकांश नेताहरूले वैकल्पिक शक्तिहरू ध्रुवीकरणको क्रममा नेतृत्व हस्तान्तरण गरेर वैचारिक नेताको भूमिकामा बस्न प्रस्ताव गरेपछि भट्टराईले अध्यक्षमा उम्मेदवारी दिन तयार भएका प्रवक्ता शर्माले जानकारी दिए ।
बरु विशेष महाधिवेशन वा पार्टी ध्रुवीकरणको प्रक्रियामा नेतृत्व हस्तान्तरण उपयुक्त हुने तर अहिले विकल्प नखोज्न जोड दिएको उनको भनाइ छ ।
यसबीचमा नयाँ पार्टीका नेताहरूसँग भट्टराईले भेटघाट र संवाद सुरु गरिसकेका छन् । महाधिवेशनको उद्घाटन सत्रमा भट्टराईले पार्टीको प्रथम महाधिवेशनले नयाँ शक्तिलाई जोडेर मूल धारमा लैजाने बाटो तय गर्ने बताएका थिए ।
महाधिवेशनमा प्रस्तुत ३२ पृष्ठ लामो राजनीतिक तथा सांगठनिक प्रतिवेदनमा पनि भट्टराईले नयाँ शक्तिहरूबीच एकता र सहकार्यको प्रस्ताव गरेका छन् ।
आइतबारदेखि सुरु भएको महाधिवेशन मंगलबारसम्म चल्ने छ । उद्घाटन सत्र सकिएपछि आइतबार नै बन्द सत्रको कार्यक्रम सुरु भएको छ ।
