काठमाडौँ :एमालेबाट निकालिएपछि मातृभूमि जागरण अभियान चलाइरहेको नेता डा.भीम रावलले प्रधानमन्त्री तथा एमाले अध्यक्ष केपी शर्मा ओलीको चर्को आलोचना गरेका छन् । प्रधानमन्त्री ओलीका पछिल्ला काम कुराले देश र जनताप्रतिको जिम्मेवार चरित्र नदेखाएको भन्दै १५ बुँदे आरोप लगाएका हुन् ।

१५ बुँदे आरोप पत्रमा प्रधानमन्त्री ओलीले फौजदारी अभियोग र मुद्दा लागेका, गुण्डागर्दी र अनैतिक क्रियाकलापको घेरामा रहेकाहरूलाई कारबाही गर्नु त टाढाको कुरा स्पष्टीकरणसम्म पनि नसोधेको उल्लेख छ ।

वक्तव्यमा भनिएको छ, ‘उल्टै राज्य र पार्टीका महत्त्वपूर्ण पद र अवसर दिने तर पार्टीका घोषित सिद्धान्त, नीति र कार्यक्रम विपरीत वा अमिल्दा काम र कुरा गरिनु हुन्न भन्ने आशयका साथ आलोचना र टिप्पणी गर्ने तथा राष्ट्रिय हितमा आवाज उठाउनेलाई ’कारबाही’को डन्डा चलाउने ।’

भू-माफिया, दलाल र बिचौलियाहरूको स्वार्थ पूरा गर्न अध्यादेश ल्याउने र त्यस्तो अध्यादेशमा सांसदहरूलाई यथोचित छलफल गर्न रोक्ने दुराशयले संक्षिप्त प्रक्रियाद्वारा अध्यादेश पारित गर्ने निर्णय मन्त्रिपरिषद्बाट गराएको आरोप छ ।

प्रतिनिधि सभामा प्रधानमन्त्रीसँग सांसदहरूको प्रश्नोत्तर कार्यक्रममा सांसदहरूका प्रश्नहरूको उचित उत्तर दिनुको साटो प्रश्न सोध्नेहरूमाथि नै आक्रोश पोख्दै प्रधानमन्त्रीको जनउत्तरदायी कर्तव्य, गरिमा तथा प्रश्नोत्तर र संसदीय अभ्यासको नै खिल्ली उडाएको टिप्पणी गरेका छन् ।