काठमाडौं : काठमाडौंको कमलपोखरीस्थित जैन मन्दिरमा आवार्य श्री सुनील सागरजी महाराज उपस्थितिमा महाआरती र विभिन्न धार्मिक कार्यक्रमको आयोजना भएको छ ।
आवार्य सागरजी महाराज अहिंसा रथ सत्य, अहिंसा, सदाचार तथा शाकाहारको सन्दर्भमा भारतको विभिन्न राज्यमा प्रचार प्रसार गर्दै काठमाडौं आगमनको अवसरमा महाआरती र धार्मिक कार्यक्रमको आयोजना भएको हो ।
जैन मन्दिर कमिटी तथा सामूहिक जिनेन्द्र आराधना संस्था नेपाल शाखाका अध्यक्ष सुभाष जैन सेठीका अनुसार यस अवसरमा श्री आदिनाथ भगवानको अभिषेक, शान्तिधारा र अहिंसा रथमा विराजित भगवान महावीरको अभिषेक र शान्तिधारा एवम् नित्य नियम पूजन पाठ गरिएको थियो ।
यस अवसरमा पञ्च परमेष्ठि, भगवान आदिनाथ, भगवान महावीरलाई ४८ दीपद्वारा महाआरती गरिएको थियो ।
अध्यक्ष सेठीले भगवान महावीरको सन्देशलाई जनजनसम्म पुर्याउने उद्देश्यले अहिंसा रथको आयोजना गरिएको जानकारी दिए ।
नेपाल जैन परिषदका अध्यक्ष विमलचन्द राखेचा, नेपाल अणुव्रत समितिका अध्यक्ष फूल कुमार लालवानीसहितले भगवान महावीरको सन्देश र अहिंसा रथद्वारा जैन धर्मको प्रभावनाका विषयमा मन्तव्य प्रकट गरे ।
यसैगरी, पप्पू भैयाजीले पनि आचार्य सागरजी महाराजद्वारा प्रवर्तित अहिंसा रथको उद्देश्यमाथि प्रकाश पारेका थिए ।
त्यस अवसरमा जैन मन्दिर कमिटी र नेपाल जैन परिषदका पदाधिकारीद्वारा पप्पू भैयाजी, नवराज शर्मा र चालक नरेन्द्र पटेललाई माला तथा खादा पहिर्याएर स्वागत सम्मान गरिएको थियो ।
