ललितपुर : ललितपुर महानगरले लगनखेलमा रहेको अव्यवस्थित संरचना हटाएको छ ।
लगनखेलमा अवस्थित ऐतिहासिक सम्पदा न्हु पोखरी संरक्षण र विस्तार गर्नका लागि पोखरी अगाडिका ५ नं. वडा कार्यालय भवनका साथै लगनखेल चोकसम्मको भवनहरू भत्काइएको छ ।
सो क्षेत्रमा रहेका पसल, टहरा र अन्य पक्की संरचना समेत महानगरको डोजरले भत्काएको छ । न्हु पोखरी महानगरले संरक्षण गरिरहेको र सर्वसाधारणले सहजरूपमा ऐतिहासिक महत्वको न्हु पोखरीलाई देख्नसक्ने गरि पोखरी अगाडीको संरचना हटाइएको महानगर प्रमुख चिरिबाबु महर्जनले जानकारी दिए । उनले ललितपुर महानगरका अन्य क्षेत्रमा रहेका ऐतिहासिक महत्त्वका स्थानलाई सहजरूपमा देखिने गरी काम हुने बताए ।
त्यस्तै ललितपुर नगर प्रहरी प्रमुख सीताराम हाच्छेथुले ३१ असार २०८२ सम्म न्हु पोखरी पुननिर्माण सम्पन्न गर्ने गरी काम अघि बढेको जानकारी दिए । पहिलो चरणमा सो क्षेत्रमा रहेका १२ वटा टहरा भत्काइएको उनले बताए ।
