वीरगन्ज : वीरगन्जमा मधेश साहित्य महोत्सव हुने भएको छ । उत्कर्ष नेपालको आयोजनामा २२ र २३ चैतमा महोत्सव आयोजना हुन लागेको हो । 

मधेशको सामाजिक, सांस्कृतिक र साहित्यिक उन्नयनलाई प्रवद्र्धन गर्ने उद्देश्यले महोत्सव आयोजना गर्न लागिएको महोत्सव आयोजन समितिका संयोजक गणेश लाठले जानकारी दिए ।

वीरगन्जमा बुधबार आयोजित पत्रकार सम्मेलनमा संयोजक लाठले दुई दिने महोत्सवमा तराई–मधेशका २२ वटा जिल्लाका साहित्य, भाषा, कला र संस्कृतिलाई समेटिने बताए । महोत्सवमा तराई–मधेशका भोजपुरी, मैथिली, अवधि, थारु, माडवारी, उर्दु, हिन्दी भाषाका साथै नेपाली र नेवारी भाषाका साहित्यकार, कवि, कलाकार, चित्रकार, विश्लेषक, स्तम्भकार, लेखक, सर्जकलगायतले आ–आफना सृजना प्रस्तुत गर्ने छन् ।

मधेश विश्वविद्यालयको प्रांगणमा आयोजना हुने महोत्सवको पहिलो दिन २२ चैतमा उद्घाटन शत्रपछि साहित्यसम्बन्धी विभिन्न सत्र, कवि गोष्ठी र साँझ सांस्कृतिक कार्यक्रम आयोजना गरिने छ । 

यस्तै दोस्रो दिन २३ चैतमा सामूहिक किताब विमोचन, मधेशको लोककला, संस्कृति, भाषा, साहित्यसम्बन्धी विभिन्न शत्र र साँझ काव्य तथा सांगीतिक कार्यकम हुनेछ ।

पत्रकार सम्मेलनमा उत्कर्ष नेपालका अध्यक्ष रितु राजले पहिलो पटक आयोजन गर्न लागिएको महोत्सवले तराई–मधेशको भाषा, साहित्य, कला र संस्कृतिसहित मधेशको समग्र पहिचानलाई उजागर गर्ने अपेक्षा लिएको बताए ।