मुगु : मुगुको रारा तालमा पौडी खेल्ने क्रममा एकजनाको डुबेर मृत्यु भएको छ । तालको पूर्वी भागमा पर्ने ठाकुरनाथ नजिकै किनारमा पौडी खेल्दै गर्दा छाँयानाथ रारा नगरपालिका–५ कार्कीबाडाका २१ वर्षीय शिशिरजंग रावलको डुबेर मृत्यु भएको हो ।
मृतक रावल रारा ताल वरिपरि निर्माणाधीन अवस्थामा रहेको साइकल लेनमा काम गर्दै थिए । अन्य चारजना साथीहरूसँगै पौडी खेल्ने क्रममा रावलको डुबेर मृत्यु भएको प्रहरीले जनाएको छ ।
दिउँसो २ बजेको घटनाबारे जानकारी पाउनेबित्तिकै नेपाली सेनाको हनुमानध्वज गुल्मबाट २ वटा डुंगासहित नेपाली सेना घटनास्थल पुगेको थियो ।
रारा विमानस्थल र जिल्ला प्रहरी कार्यालयबाट थप प्रहरी टोली पुगी तालबाट शव बाहिर निकालेको थियो । शव पोस्टमार्टमका लागि जिल्ला अस्पताल मुगु लगिएको छ ।
