नवलपरासी : पश्चिम नवलपरासीको पाल्हिनन्दन गाउँपालिका–१ झरहीखोलास्थित महेशपुर–भुजहवा भित्री सडकखण्डमा शनिबार दिउँसो भएको सवारी दुर्घटनामा २ जनाको मृत्यु भएको छ ।
जिल्ला प्रहरी कार्यालयका अनुसार दिउँसो लु २ ख ६५४ नम्बरको बसले ओभरटेक गर्ने क्रममा लु ४७ प ४८७९ नम्बरको मोटरसाइकललाई ठक्कर दिँदा दुई जना गम्भीर घाइते भएका थिए । दुर्घटनामा परी प्रतापपुर गाउँपालिका–४, पाँचपेडाका २० वर्षीय भोला राजभर र रामग्राम नगरपालिका–१५, डिगवलका २१ वर्षीय राहुल राजभर गम्भीर घाइते भएका थिए ।
दुवै घाइतेलाई तत्काल उपचारका लागि जिल्ला अस्पताल, परासी लगिएको भएपनि उपचारकै क्रममा दिउँसो साढे २ बजे चिकित्सकले मृत घोषणा गरेका थिए ।
घटनामा संलग्न बस चालक रामग्राम नगरपालिका–४, इम्लीटोलका ३१ वर्षीय सदाम अली अन्सारीलाई प्रहरीले नियन्त्रणमा लिएको छ । दुर्घटनाबारे थप अनुसन्धान भइरहेको जिल्ला प्रहरी कार्यालयका सूचना अधिकारी प्रहरी नायब उपरीक्षक (डीएसपी) वीर दत्त पन्तले जानकारी दिए ।
