विधान कार्की पछिल्लो दशकमा नेपालमा उदाएका म्युजिक भिडियो निर्देशकका रुपमा चिनिन्छन् । उनले सर्ट फिल्म र विज्ञापन पनि निर्देशन गरेका छन् । उनको भिडियोमा नेपाली चलचित्रमा स्थापित कलाकारदेखि भिडियोमा उदाउँदै गरेका कलाकारहरुले अभिनय गरेका छन् । अमेरिकामा फिल्म मेकिङ पढेका विधानको म्युजिक भिडियोमा प्रगति आफैंमा लोभलाग्दो छ । उनै विधान कार्कीले मध्यान्ह दैनिकका लागि सानु श्रेष्ठसँग गरेको संक्षिप्त कुराकानी :
आजकल के गर्दै हुनुहुन्छ ?
म अहिले म्युजिक भिडियो निर्देशन गर्ने र त्यसको सम्पादन कार्यमा व्यस्त छु ।
भिडियो निर्देशनमा कसरी आउनुभयो ?
मेरो जन्म कैलालीको टीकापुर नगरपालिका अस्नेहरीमा भएको हो । म कक्षा ८ पढ्दा देखिनै सडक नाटक र स्टेज नाटकहरु लेख्ने र निर्देशन गर्थें । सानैदेखि निर्देशन पेशामा संलग्न भएकाले भविष्यमा पनि निर्देशककै रुपमा आफुलाई अघि बढाउने सपना बोकेर बि.स. २०६३ मा काठमाडौँ आएलगत्तै निर्देशन पेशामा निरन्तर छु ।
तपाईंको समयको भिडियो निर्देशन र अहिलेको भिडियो निर्देशनमा के फरक पाउनुभएको छ ?
आजभन्दा दश वर्षअघि मैले भिडियो निर्देशन गर्दाको समय र अहिले निर्देशन गर्ने समयको कुरा गर्दा भिडियो निर्माण प्रविधिले निकै फड्को मारेको छ । डिजिटल प्रविधिले कामको गुणस्तरलाई उत्कृष्ट बनाएको छ । म्युजिक भिडियो निर्माणले व्यवसायीकरण पाएको छ । भिडियो निर्देशन गर्ने शैलीमा भने केही फरक पाएको छैन ।
भिडियो निर्देशन गर्नुअघिको तयारी कस्तो हुन्छ ?
मैले निर्देशन गर्ने हरेक भिडियोको तयारी पूर्णरुपले गरेको हुन्छु । गीतलाई कपीमा लेख्ने, गीतको भाव बुझ्ने र गीतको अर्थ अनुसार कथा बुन्ने गर्छु । त्यसरी हरेक गीतको कथा तयार भएपछि कलाकार, भिडियो निर्माण टिम र प्राविधिक छनोट गर्छु । मैले निर्देशन गर्ने म्युजिक भिडियोको कथा र पटकथा तयार गरेर मात्रै छायांकन गर्छु । यो सबै गर्दा मलाई कम्तिमा ७ दिन लाग्ने गर्छ ।
एउटा गीतलाई भिडियोमा न्याय दिन निर्देशकलाई कतिको चुनौतीपूर्ण छ ?
मेरो विचारमा हरेक गीतले एउटा छुट्टै चुनौती र अवसर बोकेर आउँछ । एउटा राम्रो गीतलाई भिडियोको माध्यमबाट पर्दामा उत्कृष्ट ढंगले उतार्नु भिडियो निर्देशकको जिम्मेवारी हो । एउटा गीतलाई भिडियोमा न्याय दिन भिडियोमा समावेश हुने कलाकार, त्यसको निर्माण शैली, कथावस्तु, प्राविधिकको काम र निर्देशकको निर्देशन क्षमताले अहम् भूमिका निर्वाह गर्ने गर्छ । म मेरा भिडियोलाई चुनौती मात्रै नभएर अवसरको रुपमा पनि लिन्छु । हरेक भिडियोलाई उत्कृष्ट बनाउन शत प्रतिशत मेहनत गर्छु ।
तपाईंले अमेरिकामा फिल्म मेकिङ पढेर आउनुभएको छ । त्यसले भिडियो निर्देशनमा कतिको सहयोग पुगेको छ ?
तपाईं कि त पढेर या त परेर कुनै पनि विषयमा ज्ञान लिन सक्नुहुन्छ । मेरा लागि अमेरिकामा फिल्म मेकिङ पढ्नु निकै फलदायी भएको छ । मसँग काम गरेको अनुभव र फिल्म मेकिङ सम्बन्धी शिक्षाले जस्तो सुकै काम गर्न सक्ने क्षमतालाई निखारेको छ । फिल्म मेकिङ पढेर आएपछि मलाई भिडियो निर्देशनमा व्यवसायीकरण गर्न सहज भएको छ । म अहिले छोटो समयमा राम्रो काम गर्ने निर्देशक भएको छु । मेरो भिडियो प्रस्तुत गर्ने शैलीमा समेत फरक देखिएको छ ।
तपाईंले ल्याउनु भएका कलाकारहरु अहिले सफल छन्, यसलाई कसरी लिनु हुन्छ ?
म पनि कुनै बेला नयाँ थिएँ, जहाँ मलाई अवसरको खोजी थियो । म त्यही दिनलाई सम्झिँदै मेरा म्युजिक भिडियोमा नयाँ कलाकारहरुलाई अवसर दिने गर्छु । मसँग काम गर्ने थुप्रै नवकलाकारहरु अहिले नेपाली सांगीतिक र चलचित्र क्षेत्रमा व्यावसायिकरुपमा सफल हुनुहुन्छ, यो मेरा लागि खुशीको कुरा हो । मैले सिकाएका कुराहरुले उहाँहरुको कलाकारितामा आएको निखार्तामा मलाई गर्व लागेको छ । यो मैले नेपाली म्युजिक भिडियो मेकिङ र सांगीतिक क्षेत्रमा दिएको योगदान हो जस्तो लाग्छ ।
तपाईं नेपालको महँगो पारिश्रमिक लिने भिडियो निर्देशकमा पर्नुहुन्छ नि हो ?
मैले राष्ट्रियस्तरमा पाएको सफलता, परिपक्क निर्देशन क्षमता र हरेक भिडियो निर्देशनमा मैले गर्नुपर्ने मेहनतका कारण म महँगो पारिश्रमिक लिने गर्छु । मैले महँगो पारिश्रमिक लिए बमोजिमको भिडियोको नतिजा दिने गरेको छु । अहिलेसम्म मसँग काम गर्ने भिडियो निर्माताहरुलाई निराश बनाएको छैन ।
सधैंभरी भिडियो निर्देशन नै गरिरहने हो कि फिल्मतिर पनि आउने सोच बनाउनुभएको छ ?
मैले म्युजिक भिडियो निर्देशनबाहेक छोटा चलचित्र, वृतचित्र र टेलिभिजन विज्ञापनको निर्देशन गरेको छु । अब भने गुर्खाज ‘द स्टोरी अफ अ ब्रेवरी’ नामक चलचित्र निर्देशन गर्दैछु । जुन चलचित्रको कथा म र अमेरिकामा बस्ने नेप्सिनेका ग्लोबल सीइओ रायन रेजले लेख्दैछौं । चलचित्रमा नेप्सिने र दक्षिण भारतीय फिल्म कम्पनीको निर्माण रहनेछ भने नेपाली र भारतीय कलाकारहरुको अभिनय रहनेछ । यसको निर्माणमा भारतबाट प्राविधिक टोली आउने तय भएको छ । अर्को वर्ष छायांकन गरी त्यसको एक वर्ष भित्र ग्लोबल रिलिज गर्ने तयारीमा छौं ।
भिडियो निर्माणमा अवसर र चुनौतीहरु के–के छन् ?
अहिले नेपाली म्युजिक भिडियो निर्माण पेशागतरुपमा व्यवस्थित भैसकेको छ । त्यसकारण अहिले पर्याप्त अवसरहरु छन् । तपाईंको निर्देशकीय क्षमता र पेशाप्रतिको इमान्दारिताले तपाईंलाई अवसरको नजिक लैजान्छ । अहिले भिडियो निर्देशनको प्रतिस्पर्धा भने चुनौतीपूर्ण छ । कम समय र थोरै लागतमा भिडियो निर्माण गर्नु पर्ने अवस्थाका कारण निर्देशकहरुमा ठुलो चुनौती थपिएको छ ।
समकालीन भिडियो निर्देशकको उपस्थिति बाक्लो छ । यो उपस्थितिमा आफूलाई कतिको प्रतिस्पर्धी मान्नुहुन्छ ?
मसँगै काम गर्ने निर्देशकहरुमध्ये थोरै निर्देशकहरु अहिले पनि काम गरिरहनु भएको छ । धेरै निर्देशकहरुको भिडमा मैले निर्देशन गर्ने शैलीमा भिन्नता छ, जसका कारण नेपालमा मलाई अरु प्रतिस्पर्धीभन्दा फरक बनाएको छ । मेरो लागि पहिलो प्रतिस्पर्धी म आफैं हो । तर अरुका लागि भने म बलियो प्रतिस्पर्धी हो ।
नेपालमा म्युजिक भिडियोको भविष्य कस्तो देख्नुभएको छ ?
अहिले नेपाली म्युजिक भिडियोको बजार अन्तर्राष्ट्रियस्तरमा समेत फराकिलो बन्दै गएको छ । अहिलेको अवस्थालाई हेर्ने हो भने नेपालमा म्युजिक भिडियोको भविष्य उज्ज्वल छ । भविष्य कस्तो बनाउने भन्ने कुरा तपाईं आफुमा पनि भर पर्छ ।
भिडियोबाट अवार्ड पनि पाउनुभएको होला नि ?
भिडियो निर्देशकको रुपमा अहिलेसम्म मैले आधा दर्जन बढी राष्ट्रिय तथा अन्तर्राष्ट्रिय अवार्ड पाएको छु ।
तपाईंका सफल भिडियोहरु ?
‘नबोली नबोली’, ‘काले केटा २’, ‘धर्ति आकाश’, ‘केटो अलि कमाउने होस्’, ‘तिम्रो संसार’, ‘मै राम्री हु कि’, ‘यस्तो माया’ आदि ।
म्युजिक भिडियो निर्देशन यात्रामा सम्झिनै पर्ने व्यक्ति ?
अर्जुन पोखरेल, दीपक शर्मा, महेश खरेल
भावी योजना ?
म मेरो बाँकी जीवन नेपाली सांगीतिक र चलचित्र क्षेत्रमा चलचित्र निर्देशकको रुपमा समर्पण गर्न चाहन्छु ।
Kamalpokhari, Kathmandu
Phone : 01-5326366, 01-5328298
Mobile : 9841293261, 9841206411
Email : madhyanhadaily59@gmail.com
सूचना विभाग दर्ता नं. : 807/074/075
© 2024 मध्यान्ह सर्वाधिकार सुरक्षित | Managed by Bent Ray Technologies