रुकुम पश्चिम : रुकुम पश्चिममा सोमबार राति आएको बाढीले घर बगाउँदा पुरिएर तीन बालिकाको मृत्यु भएको छ । आठविसकोट नगरपालिका १२ को झिन्चौर बगरमा झिन्चौर खोलामा आएको बाढीले घर बगाउँदा तीन बालिका पुरिएका थिए ।
ती बालिका भूकम्पपछि बनाइएको अस्थायी टहरामा सुतेको प्रहरीले जानकारी दिएको छ । बालिकाहरु शेरबहादुर पुनको अस्थायी टहरामा सुतेका थिए ।
जिल्ला प्रहरी कार्यालयका सूचना अधिकारी प्रहरी निरीक्षक बखत बहादुर शाहीका अनुसार बाढीले घर भत्किँदा तीन जना बालिकाको मृत्यु भएको छ भने एक जना बेपत्ता छन् । सात जना घाइते भएका छन् । अस्थायी टहरामा सुतेका १० वर्षीया हितमाया पुन, आठ वर्षीया धनसा पुन र चार वर्षीया मनिषा सार्कीको मृत्यु भएको उनले बताए ।
बाढीमै परेर अर्को घरका सुतेका डिल्ली बहादुर बुढाथोकी बेपत्ता भएका छन् । उनको खोजी कार्य भइरहेको छ । घाइतेहरुको आठविसकोट नगर अस्पतालमा उपचार भइरहेको र अवस्था सामान्य रहेको प्रहरीको भनाइ छ । खोलाको बाढीले थप तीन वटा घर र दुई वटा घुम्ती पसलहरू बगाएको प्रहरी निरीक्षक शाहीले बताए ।
गिजागार खोलामा आएको बाढीले स्थानीय गमबहादुर खत्रीको जस्ता पाताले छाएको घर, घुम्ती पसल, धनजित सार्कीको घुम्ती पसल र आठविसकोट नगरपालिका वडा नम्बर ८ का दीपक परियारको कच्ची घर, शौचालय र अर्को एउटा टहरा पनि बगाएको प्रहरी निरीक्षक शाहीले बताए ।
पानी परिहेको र खोलाको सतह बढिरहेकाले सतर्क रहन स्थनीय प्रहरीले माइकिङ गरिरहेको छ । यहाँका दर्जनौं घर र अस्थायी टहरा बाढी पहिराको जोखिममा रहेका छन् । ती बालबालिकाहरु शेरबहादुर पुनको अस्थाई टहरामा सुतेका थिए ।
