अर्घाखाँची : अर्घाखाँचीको शितगंगा नगरपालिका वडा नम्बर १२ हिलेखोलामा जिप दुर्घटना हुँदा एक जनाको मृत्यु भएको छ भने ७ जना घाइते भएका छन् । दुर्घटनामा परी अन्दाजी ६०/६५ वर्षीय नाम नखुलेका एक पुरुषको मृत्यु भएको जिल्ला प्रहरी कार्यलय अर्घाखाँचीका प्रहरी प्रमुख प्रतीत सिंह राठौरले जानकारी दिए ।
शितगंगा नगरपालिका- १२ मा पर्ने हिलेखोलास्थित सन्धिखर्क गोरुसिंगे सडकखण्डमा बुधबार बिहान ११ बजे लु १ ज ४७६३ नम्बरको डबल क्याप जिप दुर्घटना भएको डीएसपी राठौरले जानकारी दिए ।
‘जिप दुर्घटनामा परेर एक जनाको मृत्यु भएको छ भने ७ जना घाइते भएका छन्, घाइते सबैलाई उद्धार गरी प्राथमिक उपचारका लागि स्वास्थ्य चौकी ठाडामा लगिएकोमा ४ जनालाई बुटवल रिफर गरिएको छ,' शितगंगा नगरपालिकाका नगर प्रमुख छबिलाल पौडेलले भने ।
अर्घाखाँचीको छत्रदेवबाट बुटवलतर्फ जाँदै गरेको जिप आफैं अनियन्त्रित भइ सडकबाट अन्दाजी ६० मिटर तल खसेको जिल्ला प्रहरी कार्यालय अर्खाखाँचीका प्रहरी निरीक्षक विपिन कार्कीले जानकारी दिए ।
