दाङ : दाङको घोराही उपमहानगरपालिका वडा नम्बर १६ मा दिउँसै लुटपाट र ज्यान मार्ने प्रयास भएको छ । घोराही उपमहानगरपालिका वडा नम्बर १६ की शान्ति चौधरीको घरमा कोही नभएको मौका पारी लुटपाट गर्ने क्रममा ज्यान मार्ने प्रयास भएको हो । 

सोमबार दिउँसो सवा बाह्र बजे दुई जना ब्यक्ति खुकुरी र फलामको रड लिएर घरको ताला फोरेर लुटपाट गर्न खोजिरहेका थिए । त्यही क्रममा शान्ति चौधरीले देखेपछि लुटपाट गर्न आएका मध्ये एक जनाले दुई पटक खुकुरी प्रहार गरेका थिए । 

तर चौधरीले भागेर ज्यान जोगाउन सफल भएकी थिइन् । ‘घरमा ताला लगाएर बाहिर बस्तुभाउलाई दाना खुवाउँदै थिए, ताला फोडेको आवाज सुनेपछि घरभित्र पस्दा दराज फोडिरहेका थिए’चौधरीले भनिन्,‘चोर भनेर गुहार माग्दा मलाइ खुकुरी हान्ने प्रयास गरे र मोटरसाइकलमा भागे’ अन्जान व्यक्ति भएको र फेरि देखे चिन्ने बताइन् । 

घटना भएको खबर पाए लगत्तै घोराही उपमहानगरपालिका वडा नं.१६ का वडाध्यक्ष तारा बहादुर डाङी र अस्थायी प्रहरी पोस्ट सरराका वरिष्ठ हवल्दार हेमराज अधिकार पुगेका थिए । हवल्दार अधिकारीले हतियारसहित भएका ब्यक्ति पेशेवर चोर हुनसक्ने बताए । 

ती दुई व्यक्तिलाई प्रहरीले खोजेर कानूनी कारबाही गरिने बताएका थिए । चाडपर्वको समयमा यस्ता अपराधी घटनाहरू हुनसक्ने भएकाले सचेत रहन उनले आग्रह गरेका थिए । घोराही उपमहानगरपालिका वडा नम्बर १६ का वडाध्यक्ष डांगीले शंका लागेको व्यक्तिहरू टोल वा घरमा प्रवेश गरेमा तुरुन्त वडा कार्यालय वा प्रहरी कार्यालयमा खबर गर्न सुझाव दिए ।