रौतहट : रौतहटको वन गस्तीटोलीले बुधबार बिहान राष्ट्रिय वन क्षेत्रबाट २ थान बन्दुक र खयरको २० थान डमरुसहित एकजनालाई पक्राउ गरेको छ । 

डिभिजन वन कार्यालय चन्द्रनिगाहपुर अन्तर्गत गैंडाटार सवडिभिजन वन कार्यालय रौतहटको रेन्जर विकाश लामिछानेको नेतृत्वमा गएको ५ जनाको गस्ती टोलीले बन्दुक र खयरको डमरुसहित एक जनालाई पक्राउ गरेको हो ।

विषेश सूचनाको आधारमा रौतहटको चन्द्रपुर नगरपालिका वडा नंं ३ को राष्ट्रिय वन क्षेत्रमा अतिक्रमण गरी बसेको ख्याकु गाउँको कान्छामान जिम्वालाई बन्दुकसहित पक्राउ गरेको रेन्जर लामिछानेले जानकारी दिए । 

३ घण्टा वन क्षेत्रमा खोजेपछि जिम्बाको गोठमा खानतलाशी गर्दा भरुवा वन्दुक थान २ र खयरबाट तयार भएको डमरु थान २० बरामद गरेको रेन्जर लामिछानेले बताए ।

पक्राउ परेका कान्छामान जिम्बालाई अवैध वन पैदावार हानी नोक्सानी र हातहतियार सम्बन्धी मुद्दा चल्ने र उनको बारेमा थप अनुसन्धान भइरहेको डिभिजन वन कार्यालय चन्द्रनिगाहपुरका प्रमुख वन अधिकृत हेमन्त साहले बताए । सो क्षेत्रमा अवैध खयर कटानी गरेको सूचनाको आधारमा आफुले गस्तीटोली पठाएको उनले बताए ।

केही दिन अगाडि पनि रौतहटको चन्द्रपुर नगरपालिका वडा नं. २ सानो खरियान डाँडामा वन अतिक्रमण हटाएर वृक्षारोपण गर्दा वन कर्मचारीमाथि हातपात गर्न खोजेका थिए । वन क्षेत्र जोगाउन स्थानीय जनप्रतिनिधिहरुको सहयोग अतिजरुरी भएको समेत वन प्रमुख साहको भनाइ छ ।