दाङ : लैगिक हिंसाविरुद्धको १६ दिने अभियान सोमबारदेखि शुरु भएको छ । महिला सम्बन्धी काम गर्ने संघसंस्था तथा स्थानीय तहहरूले सचेतनामूलक कार्यक्रम गरी अभियानको उद्घाटन गरेका छन् । पछिल्लो समयमा लैंगिक हिंसा बढ्दै गएकाले १६ दिन मात्र नभएर सधैँ अभियान चलाउनुपर्ने बताएका छन् । 

घोराही उपमहानगरपालिका बालबालिका तथा सामाजिक विकास शाखा दाङले आयोजना गरेको लैंगिक हिंसाविरुद्धको १६ दिने अभियानका अवसरमा स्थानीय स्तरमा रहेका साझेदार संस्थाहरूको लागि लैंगिक हिंसा नियन्त्रण सम्बन्धी अन्तरक्रिया कार्यक्रममा सहभागीहरुले हिंसारहित समाज निर्माणको लागि अभियान महत्वपूर्ण रहेको बताएका थिए ।

कार्यक्रममा घोराही उपमहानगरपालिकाकी उपमेयर हुमा डिसीले अभियानको रूपमा मात्र नभएर सधैँ हिंसारहित समाज निर्माणको लागि सबैको दायित्व रहेको बताएकी छन् ।  ‘अभियान १६ दिन मात्र होइन सधैँ चलाउनुपर्छ’ उनले भनिन् ‘कानुनलाई नै चुनौती दिने गरी लैङ्गिक हिंसाका मुद्दाहरू आइरहेका छन् ।’

हिंसा सम्बन्धी बलियो आधार कानुन भएपनि कार्यान्वयनको पाटो महत्वपूर्ण भएको बताइन् ।  

जिल्ला प्रहरी कार्यालय दाङका प्रहरी नायब उपरीक्षक ईश्वर थापाले घरेलु हिंसा सम्बन्धी मुद्दा बढ्दै गएको बताए । जबरजस्ती करणी, जबरजस्ती करणी उद्योग, बहुविवाह, बालविवाह, बोक्सी आरोप जस्ता मुद्दाहरु बढ्दै गएको उनले बताए ।

समाजमा हिंसा रोक्नको लागि जनचेतना कार्यक्रम गरिनुपर्ने बताएका थिए । कार्यक्रममा नेपाल पत्रकार महासंघ दाङका अध्यक्ष दुर्गालाल केसी, अभियन्ता विकिरण गौतमले लैंगिक हिंसा न्यूनीकरण सम्बन्धी कार्यपत्र प्रस्तुत गरेका थिए ।  त्यसअवसरमा कार्यक्रममा सहभागी जनप्रतिनिधि, कर्मचारी, महिला अधिकारकर्मी, अभियन्ता, पत्रकार लगायतले लैंगिक हिंसाविरुद्ध शून्य सहिष्णुता कायम गर्ने प्रतिबद्धतामा हस्ताक्षर गरेका थिए ।

घोराही उपमहानगरपालिका महिला बालबालिका तथा सामाजिक विकास शाखाका संयोजक राममणी पाण्डेको अध्यक्षतामा भएको कार्यक्रमको सहजीकरण महिला बालबालिका तथा सामाजिक विकास शाखा प्रमुख मोति विश्वकर्माले गरेकी थिइन् । यसैबीच महिला मानव अधिकार रक्षक सञ्जाल दाङले पनि लैंगिक हिंसाविरुद्धको सरदनी अभियानको अवसरमा खुल्ला कविता वाचन गरेको थियो । सडकमा कवितामार्फत महिला हिंसाविरुद्धको आवाज उठाएका थिए ।