काठमाडौं : अनलाइन जुवा तथा क्रिप्टो करेन्सीको कारोबारको आरोपमा पक्राउ परेका २३ जनालाई प्रहरीले सार्वजनिक गरेको छ । जिल्ला प्रहरी परिसर, काठमाडौंले मंगलबार पत्रकार सम्मेलन गरी उनीहरूलाई सार्वजनिक गरेको हो । प्रहरीले उनीहरूलाई आइतबार काठमाडौंको बुढानीलकण्ठबाट प्रक्राउ गरेको थियो ।
परिसरका प्रवक्ता एसपी अपिलराज बोहराका अनुसार उनीहरूले एउटा घर नै भाडामा लिएर अनलाइनमार्फत अपराध गर्दै आएका थिए ।
३ अर्बभन्दा धेरैको अनलाइन जुवा तथा ५० करोडभन्दा धेरैको क्रिप्टोकरेन्सीको कारोबार गरेको प्रहरी अनुसन्धानमा खुलेको छ । भारतीय नागरिकले घर भाडामा लिएर अनलाइनसम्बन्धी अपराध गर्दै आएका थिए । भारतीयलाई समेत प्रहरीले पक्राउ गरेको छ ।
हालसम्मको अनुसन्धानमा ३ अर्ब १३ करोड रुपैयाँ बराबरको अनलाइन जुवा तथा ८६ करोड ९१ लाख रुपैयाँ बराबरको क्रिप्टोकरेन्सीको कारोबारी गरेको तथ्य खुलेको छ । गिरोहका मुख्य नाइके भने फरार रहेको प्रहरीले जनाएको छ ।
यसैबीच सुनको गरगहना चोरी गरेको आरोपमा प्रहरीले काठमाडौंको डल्लुबाट ३ जनालाई पक्राउ गरेको छ ।
पक्राउ पर्नेमा काठमाडौं महानगरपालिका–२९ घर भई हाल बसन्तपुर बस्ने ४१ वर्षीय नरेन्द्र देउला, काभ्रेको पनौती–१ घर भई बसन्तपुरबस्ने कोमल बहादुर कार्की र भारतको कलकत्ता प्रदेश घर भएका ५८ वर्षीय जागिर मलिक छन् ।
उनीहरूले २६ माघमा डल्लु बस्ने ज्ञानरत्न मानन्धरको घरमा भाडामा बस्ने दोलखाको फस्कु शैलुङ नगरपालिका–७ की सुनिता ठकुरीको डेराबाट सुनको गहरगहना चोरी गरेको प्रहरीको आरोप छ ।
प्रहरीले उनीहरूको साथबाट सुनको नेक्लेस १ वटा, सुनको सिक्री १ वटा, सुनको औठी १ वटा, गालेको सुन एक ढिका, सुनको तिलहरी १ वटा, सुनको कल्ली १ वटा, सुनको झुम्का १ वटा, सुनको मंगलसूत्र, सुनको मंगलसुत्रका टुक्रा ७ वटा र सुनको सिक्का १ वटा बरामद गरेको छ ।
पक्राउ परेका उनीहरूमाथि प्रहरी वृत स्वयम्भूबाट अनुसन्धान भइरहेको प्रहरीले जनाएको छ ।
