कपिलवस्तु : कपिलवस्तुको कृष्णनगर नगरपालिका–२ स्थित लिंकगेटबाट लागुऔषध ब्राउन सुगरसहित दुई भारतीय पक्राउ परेका छन् । सोमबार नेपाल प्रवेश गर्दै गरेको भारतीय नम्बर प्लेट एमएच ०२ सिडि १५२६ गाडीलाई चेकजाँच गर्ने क्रममा उक्त लागुऔषध बरामद भएको हो ।
सोही गाडीमा सवार भारत उत्तर प्रदेश सिद्धार्थनगर बढ्नी ग्राम दूधवानिया बुजुर्गका ३६ वर्षीय इकरामुद्दीन र गाडी चालक सोही स्थानका १९ वर्षीय नसिम खानलाई नियन्त्रणमा लिइएको छ ।
इकरामुद्दीनको साथबाट १०० मिलिग्राम ब्राउन सुगर बरामद भएको छ भने गाडीभित्र थप १६० मिलिग्राम ब्राउन सुगर फेला परेको प्रहरीले जनाएको छ ।
पक्राउ परेका दुवै जनालाई कपिलवस्तु जिल्ला अदालतबाट ७ दिनको म्याद थप गरी अनुसन्धान अगाडि बढाइएको प्रहरीले जनाएको छ ।
