स्याङ्जा : स्याङ्जा जिल्लामा देशकै पहिले नवग्रह मन्दिरको निर्माण सुरु भएको छ ।
अर्जुनचौपारी गाउँपालिका—१ पञ्चकन्या देवी मन्दिर परिसरमा देशकै पहिलो नवग्रह मन्दिरको निर्माण अन्तिम चरणमा पुगेको छ ।
मन्दिरको ६ फागुनमा प्राणप्रतिष्ठा तथा अनुष्ठानका विधि शुभारम्भ गरिने अर्जुनचौपारीका अध्यक्ष प्रकाश तिवारीले जानकारी दिए ।
ग्रहका गुरु मानिने वृहस्पति हरेक राशिमा १२ वर्ष रहने हुँदा १ सय ४४ वर्ष अघिदेखि सुरु भएको एकचक्र यस अवधिमा पूरा गरी अर्को राशिमा प्रवेश गरेकाले वृहस्पतिको सोही राशि परिवर्तनले निकै ठूलो धार्मिक अर्थ रहन्छ ।
यो समय धार्मिक तथा नयाँ कामको सुरुवातका लागि उत्तम समय रहेकाले यसै समयलाई सदुपयोग गर्दै पालिकाले नवग्रह मन्दिर निर्माण कार्यलाई तीव्रता दिएको हो ।
नवग्रहको रूपमा पूजा गर्ने मन्दिर नेपालमा कहिँ नभएको अध्यक्ष तिवारीले बताए । धार्मिक तथा पर्यटकीय गन्तव्यका रूपमा विकास गर्ने लक्ष्यसहित नवग्रह मन्दिरमा ९ दिनसम्म विभिन्न धार्मिक कर्म, विधि, गीता पाठ, अनुष्ठान गरिनेछ ।
गणेश, कुलदेवता, इष्टदेवता, लक्ष्मी, दुर्गा, कालभैरव, हनुमान पञ्चकन्या देवीका पूजा भनेको नवग्रहको पूजा हो । मन्दिरमा नौवटा भुजा राखिनेछ । ५ फिटको उचाइमा नवग्रहका ९ मूर्ति राखिनेछ । त्यसमाथि उचाइमा रहने पिल्लरमा चतुर्भुज आकारको सूर्यतर्फ फर्केको सौर्य मण्डालीयको प्रतिमा रहनेछ । मन्दिर परिसरभित्रे ९ वटा वृत्त बीचमा रहनेछ । मन्दिर परिसरमा षट्कोण र त्यसको बीचमा पशुपतिनाथका जस्तै ७ क्विन्टलको पञ्चमुखी शिवलिंग राखिने छ ।
वर्ष दिनमा एकपटक आउने गणेश चतुर्थीका दिन र प्रत्येक साताको शनिबार मन्दिर दर्शन तथा नवग्रहको विधिवत् पूजा गर्न पाइने छ ।
नवग्रह मन्दिर भारतको असामस्थित चित्रसालको पहाडमा रहेको भनाइ छ । तर, नेपालमा भने पहिलो पटक बनाउन लागिएको हो ।
नौवटा सर्कल रहने मन्दिरको माथिबाट घुम्न थालेपछि तल्लो भाग सुरुङ मार्ग हुँदै बाहिर निस्कन सकिने गरी बनाइएको छ । क्रमागत रूपमा निर्माण गरिने मन्दिरलाई अर्जुनचौपारीले विशेष धार्मिक एवं पर्यटकीय केन्द्रबिन्दुको रूपमा विकास गर्ने लक्ष्य लिएकोे उपाध्यक्ष सपना गुरुङको भनाइ छ ।
