काठमाडौं :  सांसदहरूले राजतन्त्र पक्षधरको नाराजुलुसको सरकारको ध्यानाकर्षण गराएका छन् । 

राष्ट्रियसभाको आइतबारको बैठकको शून्य समयमा नेकपा (एकीकृत समाजवादी) का सांसद उदयबहादुर बोहोराले केही समययता काठमाडौँलगायत देशका केही सहरमा नाराजुलुस भइरहेको उल्लेख गर्दै लोकतन्त्रमाथि प्रहार भएकामा चिन्ता व्यक्त गरे ।

उनले सरकार र राजनीतिक दलले कार्यशैली सच्याउन आवश्यक रहेकोमा जोड दिए । देशबाट बेतिथिको अन्त्य, महङ्गी नियन्त्रण र सुशासन प्रवद्र्धनमा सरकार दृढतापूर्वक लाग्नुपर्ने उल्लेख गरे ।

माओवादी केन्द्रकै सांसद जगप्रसाद शर्माले बढ्दै गइरहेका राजावादीका गतिविधिलाई सरकारले नियन्त्रण गर्न नसकेकोमा प्रश्न गरे ।
सांसद शर्माले राजावादीको नाममा भइरहेका गतिविधि नियन्त्रणमा लिन सरकारलाई आग्रह गरे ।

नेकपा (एकीककृत समाजवादी)की सांसद जयन्तीदेवी राईले राजावादीहरू कुर्लिरहेका कारण देशमा खतरा र राजनीतिक अस्थिरता पैदा भएको टिप्पणी गरिने । सांसद राईले प्रतिगामी तत्वहरू संविधान उल्लङ्घन गर्दै लोकतन्त्रमाथि धावा बोलिरहेको बताइन् ।

केही तत्वले वर्षौं संघर्ष गरेर ल्याएका उपलब्धि फेरि खोस्न चाहेको र संविधानबाट प्राप्त अधिकार दिनदिनै कमजोर भएको सांसद राईको टिप्पणी छ ।

उनले भनिन्, ‘हामीले मसानघाटमा पु¥याएको राजतन्त्र कुर्लिरहेको छ, त्यसकारण खतरा र राजनीतिक अस्थिरता पैदा भइरहेको छ ।’ नेपाली जनताको बलिदानीबाट प्राप्त व्यवस्था जोगाउन सबै एकजुट हुने समय आएको पनि उनको भनाइ छ ।

जनता समाजवादी पार्टी–नेपालले सांसद मोहम्मद खालिदले संघीय लोकतान्त्रिक गणतन्त्रको विकल्प प्रतिगमन हुन नसक्ने बताए । 
वर्तमान व्यवस्थाभित्रै रहेर जनताको अवस्था बदल्न सक्ने हिम्मत देखाउन र जनताको विश्वास जित्नतिर लाग्न उनले आग्रह गरे ।

खालिदले प्रश्न गरे, ‘संघीय लोकतान्त्रिक गणतन्त्र चाहिँदैन भने के चाहिन्छ त ? प्रतिगमन चाहियो ?’ यस्तो चाहना पूरा हुन नसक्ने उनको आग्रह छ ।

साथै सरकारलाई संविधान विरोधी गतिविधि हेरेर नबस्न सांसद खादिलको आग्रह छ ।