दोलखा : जिल्ला ट्राफिक प्रहरी कार्यालय दोलखाका प्रमुख ठाकुर प्रसाद भट्टराईले आवाज नेपाल दोलखालाई आर्थिक सहयोग गर्ने भएका छन् । शनिबार आफ्नो ४५औं जन्मदिनको अवसरमामा आवाज नेपाल दोलखा नामक संस्थालाई खाद्यान्न सामग्री वितरण गर्दै उनले यस्तो प्रतिबद्धता व्यक्त गरेका हुन् ।

संस्थाका अध्यक्ष सिर्जना कार्कीसँग प्रमुख भट्टराईले सामाजिक उत्तरदायित्व बहन गर्दै संस्थाका एक जना बालबालिकालाई सामान्य खर्चबापत आफ्नो तलबाट वार्षिक २० हजार सहयोग गर्ने जिकिर गरे । उनले हाल आफ्नो कर्मथलो दोलखा भएपनि आगामी दिनमा जुनसुकै ठाउँमा पुगेता पनि संस्थालाई दिएको वचन कतैपनि खेर नजाने भन्दै बालबालिहरुसँग भेटघाट गर्दै खुसी व्यक्त गरे । उनले जन्मदिनको नाममा हुने फजुल खर्चलाई निरुत्साहित गर्नुपर्ने समेत बताए ।

त्यस्तै संस्थाका अध्यक्ष कार्कीले प्रमुख भट्टराईले जस्तै सबैले मिलेर सहयोग गरेमा बालबालिकाले सहज तरिकाले जीवनयापन गर्न सक्ने बताइन् ।