रौतहट : सशस्त्र प्रहरीको गस्ती टोलीले पेस्तोल र गोलीसहित एक जना भारतीय नागरिकलाई पक्राउ गरेको छ । विशेष सूचनाको आधारमा सोमबार दिउँसो सशस्त्र प्रहरी बल बीओपी बेलाबिछवाका इन्स्पेक्टर चेतन कुमार खड्काको कमाण्डमा गएको गस्ती टोलीले राजदेवी नगरपालिका-९ ब्रहमपुरी गाउँस्थित सञ्जीव सिंहले सञ्चालन गरेको पसलमा चेकजाँच गर्दा शौचालय बाहिर अवैध पेस्तोलसहित गोली बरामद गरेको हो ।

सशस्त्र प्रहरी रौतहटका सहायक प्रहरी उपरीक्षक विक्रम हुमागाईंले गस्ती टोलीले पसलमा रहेको शौचालयमाथि एक थान नलकटुवा पेस्तोल, ८ एमएमको ३ थान गोली र १ थान खोका बरामद गरिएको जानकारी दिए । हतियारसहित भारतीय नागरिक ४२ वर्षीय राजेश सिंहलाई पक्राउ गरिएको  हुमागाईंले जानकारी दिए ।

बरामद पेस्तोल, गोलीसहित पक्राउ परेका सिंहलाई जिल्ला प्रहरी कार्यालय रौतहटमा बुझाइएको हुमागाईंले बताए ।