उदयपुर : उदयपुरको विकट पहाडी गाउँपालिका ताप्लीको–३ नं. ईनामे ‘बालमैत्री वडा’ घोषित भएको छ । स्थानीय शासन अवलम्बनका विभिन्न ५१ सूचकहरू पूरा गरेसँगै वडालाई बालमैत्री घोषित गरिएको हो ।
जम्मा ६ सय ४२ घरधुरी बसोबास रहेको सो वडामा २ हजार ९ सय ८५ जनसंख्यामध्ये १ हजार २ बालबालिका रहेको वडा कार्यालयले जारी गरेको स्थितिपत्रमा जनाइएको छ ।
स्थितिपत्रमा जनाइए अनुसार बालमैत्री वडा घोषणा गर्नका लागि वडाभित्र रहेका सबै स्वास्थ्यकर्मी, महिला स्वास्थ्य स्वयंसेविका, बालक्लवहरू, युवा क्लबहरू, विद्यालय, कर्मचारी, जनप्रतिनिधि र सर्वसाधारण सबैको महत्वपूर्ण भूमिका रहेको छ ।
वडा कार्यालयमा आयोजित एक कार्यक्रमकाबिच गाउँपालिका अध्यक्ष ढुङ्गराज विश्वकर्मा र उपाध्यक्ष धनामाया मगरले संयुक्त रूपमा बालमैत्री वडा घोषणा गरे । ‘उज्यालो ताप्ली, दिगो विकास र बालमैत्रीसहितको पुर्वधार, शिक्षा, स्वास्थ्य, कृषि, पर्यटन र रोजगार, हरियाली ताप्ली समृद्धिको आधार’ भन्ने मूल नाराका वडालाई बालमैत्री घोषणा गरिएको प्रमुख प्रशासकीय अधिकृत भक्तबहादुर राईले बताए ।
हाकिम राईका अनुसार वडालाई बालमैत्री घोषणा गर्ने अभियानमा वल्र्डभिजन ईन्टरनेशनल नेपालको स्थानीय साझेदार संस्थाहरू जाल्पा एकीकृत विकास समाज र मानव अधिकार र वातावरण विकास केन्द्र (हुरेण्डेक) ले सहयोग गरेका थिए ।
केही समयभित्रै पूरै गाउँपालिकालाई बालमैत्री बनाउने गरी अभियान जारी रहेको भन्दै अध्यक्ष विश्वर्माले गाउँको शिक्षा, स्वास्थ्य, खानेपानी, सडक, यातायात, भौतिक पूर्वाधार निर्माणमा पनि सबै पक्षको यस्तै सहयोगको अपेक्षा गरेको बताए ।
गाउँपालिका उपाध्यक्ष धनामाया मगरले ताप्लीको भौतिक, सामाजिक, आर्थिक, सांस्कृतिक, भाषा लिपी र.(शैक्षिक क्रियाकलापमा बालबालिकाको समग्र विकासमा बालमैत्री वडा घोषणाले ठूलो महत्व राख्ने बताइन् ।
बालबालिकाकेन्द्रित यस्ता सकारात्मक र सृजनशील कामका लागि आवश्यक बजेट विनियोजन गर्न गाउँपालिकाले प्राथमिकता दिने प्रतिबद्धता पनि उपाध्यक्ष मगरले व्यक्त गरिन् ।
