काठमाडौं : वैदेशिक रोजगार कार्यालय काठमाडौं ताहाचलले हप्तामा दुई दिन श्रम स्वीकृत दिने भएको छ । यसअघि हप्तामा एक दिन बुधबार श्रम स्वीकृति दिने उक्त कार्यालयले कोरोना भाइरस संक्रमण केही कम भएको भन्दै आइतबार र बुधबार गरी हप्तामा दुई दिन श्रम स्वीकृति दिने निर्णय भएको बताएको छ ।
नेपालमा कोरोना भाइरसको दोश्रो लहर फैलिएपछि त्यसको रोकथामका लागि काठमाडौं उपत्यकामा निषेधाज्ञा आदेश जारी भएपछि वैदेशिक रोजगार विभागको निर्देशनमा वैदेशिक रोजगार कार्यालय ताहाचलले भौतिकरुपमा उपस्थित भएर प्रदान गरिने श्रम स्वीकृतिको कार्य स्थगित गरेको थियो ।
उक्त कार्यालयले गत बुधबारबाट हप्ताको एक दिन श्रम स्वीकृति दिन शुरु गरेको हो । गत बिहीबार साँझ बसेको मन्त्रिपरिषद् बैठकले चीन, कतार र टर्कीका लागि सातामा एक दिन नियमित उडान खोल्ने निर्णय गरेको थियो ।
सो अनुसार कतारको राजधानी दोहा, टर्कीको इस्तानबुल र चीनमा अन्तर्राष्ट्रिय उडान शुरु भएको छ । कतारको दोहा जाने नेपाल एयरलाइन्स र कतार एयरवेजबाट कामदारहरु खाडीका विभिन्न मुलुक गइरहेका छन् । कतारको दोहालाई ट्रान्जिट बनाएर खाडीका विभिन्न देशमा पुग्नु परेका कारण नेपाली कामदारहरुको उडान लागत भने अस्वभाविकरुपमा बढेको बताइएको छ ।
वैदेशिक रोजगार कार्यालय ताहाचलले बायोमिट्रक नभएका कामदारलाई कर्मचारी उपस्थित गराएर पनि श्रम स्वकिृति दिइरहेको बताएको छ । बायोमोट्रिक गरेका कामदारहरुले अनलाइन माध्यमबाट श्रम स्वीकृति पाइरहेका कारण सकेसम्म कार्यलयमा उपस्थित नहुन आग्रह गरेको छ ।
नेपाल वैदेशिक रोजगार व्यवसायी संघले व्यवसायी तथा कामदारहरुलाई श्रम स्वीकृति लिने विषयमा केही थप जानकारी लिनु परेमा संघको फेसबुक पेजमा संघको मेलमा सम्पर्क वा म्यासेज गर्न आग्रह गरेको छ ।
Kamalpokhari, Kathmandu
Phone : 01-5326366, 01-5328298
Mobile : 9841293261, 9841206411
Email : madhyanhadaily59@gmail.com
सूचना विभाग दर्ता नं. : 807/074/075
© 2024 मध्यान्ह सर्वाधिकार सुरक्षित | Managed by Bent Ray Technologies